Description

Pierre Haultin, imprimeur à La Rochelle, vend à Simon Millanges, régent au collège de Guyenne les matériels suivants :
"deux presses d'imprimerye, garnyes de leurs ustancilles, comme sont casses, chassis, frisquettes, marbres, platines, treteaulx, bancz, ancriers, poupettes et aultres [choses] moyennant le prix et somme de cent livres tournois pour chascune presse.
Plus luy a vendu audict Millanges les caractères et pieces qui s'ensuyvent, savoir est : ung gros texte et son ytalicque, ung sainct-augustin et son ytalicque, ung ciceron et son ytalicque, un petit romain et son ytalicque ; le tout pesant douze cens livres ou envyron et monte le prix et somme de dix-huict livres tournois ; moyennant toustesfoys que autant se vende à Paris par ceux qui font trafficque de semblable estoffes, et si se vendent moingtz audict Paris, ledict Milanges ne sera tenu de payer d'avantaige. Et s'il en y a qui ayent servy et soyent uzés, en ce dict cas, ledict de Milanges ne sera tenu les payer synon comme de raison. Lesquelles choses susdictes ledict Haultin a promis et sera tenu vendre, bailher et delivrer audict Milanges, en ceste ville de Bourdeaulx, par tout le moys d'aoust prochainement venant, de la voyture desquelles choses pour icelles pourter en ceste dicte ville, ledict Mylanges sera tenu en payer la moytié audict Haultyn. En deduction et payement desquelles choses ledict Mylanges en a payé et advancé sur ces presentes, audict Haultyn la somme de cent livres tournois, en trente escuz sols, deux escuz à la reyne, deux demyes imperiales et le demeurant en monnoye blanche, faisant ladicte somme de cent livres tournois que ledict Haultyn a prinse et receue, compté et nombrée, dont s'en est contanté. Et le restant du payement des susdictes choses à la raison de dessus ledict Mylange sera tenu payer audict Haultyn après la delivrance d'icelles, et quant il les aura rengées comme il sera besoing et necessaire au lieu que promptement ledict Mylanges luy aura balhé lors pour ce faire. Et pour entretenir ce que dessus, etc. Faict et passé en la ville et cité de Bourdeaulx, le XVIIe jour de jung mil cinq cens soixante-douze ez presences de messieurs maistres Hellyes Vinet et Pierre Claverie, regents audict colliege de Guyenne, tesmoings à ce appelés et requis."

Date

1572-06-17

Place of conservation

Bordeaux, Archives départementales de la Gironde

Shelfmark

(série E, notaires : Themer)